En oasmt in
en oasmt uut

Ze zeggn dat n straffe is,
en da we t gezocht een
een baffe up uus muule van n planeete
woa dat er van ooles an skilt
die uus nie mée wilt
en dat t ool uus skult is

Ze zeggn dat t komt
omda we mè te veeln zyn
en dat r nie genoeg is
en ze zeggn dat n complot is
dat t uut n labo komt
van ne zot die peist dat n god is

En ze zeggn dat van de Noordpool komt
woa da d yskappn nu zidder smeltn
dan joene kréem van de karre
en rad wuk da ze doa nog ool goan vienn
En ze zeggn dat komt deur die busbrann
en dat r nog van ooles up uus ofkomt
woa da we nie teegn k unn wienn

Moa oasmt in
en oasmt uut
en oasmt in
en oasmt uut
en oasmt in
en oasmt uut

Ze zeggn dat t in de lucht oenk
dat t nie anders koste
dat moeste gebeurn
en dat nog oolsan in de lucht angt
en ze zeggn dat n boel noais an meugn sluutn
en da ze veel te tieluk were g oopend een
Ze zeggn dat t noais mée lik tevoarn goa zyn
en t zyn der die under reize
uutstelln toet noast joare

Ze zeggn dat de wéreld failliet goat
da ze voa de grotste crisis in oenderd joar stoat
en ze zeggn dat t mè n bitje sjanse
toch zoe moetn lukkn
en da w oolsan nog wa geld
by zoenn kunn drukkn

en ze zeggn da w in de leugens goan versmoarn
u w ooles geloovn wuk d w oarn

En oasmt in
en oasmt uut
en oasmt in
en oasmt uut
en oasmt in
en oasmt uut

Up de radio zeggn ze dat der noais
géen carnaval mée goa zyn
dat de zwangerschapstestn
by n apotheker uutverkocht zyn
en da de wyn van vandjoare
goa smoakn noa azyn
en dat r ne golf up uus ofkomt
van echtskéediengn
en da j nu in t shoppingcenter
veel interessante batjes kunn vienn

en dat t van t weekend vrée skoan were goa zyn
dus oenn ze rekeninge
mè n oeverroempelinge
up n tring noa de zée
en in de gazette leeze k
voa da da virus kan verdwynn
da de heilige Corona moe verskynn
De Chinoan en n Amerikeez wysn noa mekoar
en ge goat deuresloan
uj bluuft geloovn wuk daj leest

Moa oasmt in
en oasmt uut
en oasmt in
en oasmt uut
en oasmt in
en oasmt uut

Ze zeggn daj t moeilijk kunn krygn uj road zyt
da je téerder zyt uj wit zyt,
da je t langer ee uj zwort zyt
da je zidder geneest uj geel zyt
en da j t nie kunn krygn uj blauw zyt
moa gelyk wuk n kleur da j eet,
uj t gèt eet, da j der vanof zyt

moa t zyn andre die zeggn da
ne kée dat in joen bloed zit
dat t héel mis is

En oasmt in

dat t noais mée weggoat

en oasmt in

dat voe ooltyd is.

en oasmt in
en oasmt uut
en oasmt in
en oasmt uut
en oasmt in
en oasmt uut
en oasmt in
en oasmt uut
en oasmt in